Të enjten në stadiumin ‘Fadil Vokrri’ nënkampioni i Kosovës në futboll, Gjilani, do të përballet me skuadrën qipriote, APOEL Nicosia, në kuadër të fazës së parë kualifikuese të Ligës së Evropës.

Por futbollisti i skuadrës udhëtuese, serbi Vujadin Saviq, ka refuzuar të luajë ndaj ekipit nga Gjilani.

“Arsyeja e parë është se unë u karantinova për 24 ditë për shkak të ‘Koronës’ dhe nuk jam akoma 100 për qind fizikisht i gatshëm. Arsyeja e dytë i përket udhëtimit dhe ndeshjes me klubin nga i ashtuquajturi shtet i Kosovës. Është e qartë për ju që nuk ka asnjë shans që ata të më shtynin të udhëtoja atje dhe të luaja një lojë kundër tyre. Kjo do të thoshte automatikisht që e pranoj atë dhe në njëfarë mënyre ta mbështes atë histori artificiale. Kjo nuk vjen në shprehje”, ka thënë ai për “telegraf.rs”.