Kandidati për deputet nga Aleanca për Ardhmërinë e Kosovës (AAK), Gani Dreshaj, i cili nuk ka arritur të fitojë ulësen në Kuvend, ka thënë se në zgjedhjet e 6 tetorit kishte vjedhje masive në votat e kandidatëve.

Ai ka thënë se një gjë e tillë është shqetësuese për demokracinë dhe sistemin zgjedhor në Kosovë.

“Mjafton të shikoni rezultatet nga disa kuti të rinumëruara, për tu bindur në këtë. Megjithatë, nuk më mbetet zhig që s’jam në mesin e 14 deputetëve të zgjedhur në parlament”, ka shkruar Dreshaj në llogarinë e vet në “Facebook”.

Postimi i plotë i Dreshajt:

Të dashur qytetarë, ju 6 414 votues të mi

Kam obligimin të iu njoftoj se nuk jam në listën prej 14 deputetëve të AAK-së nga zgjedhjet e 6 tetorit.

Jam kandidati i parë në pritje për tu futur në parlament nga lista e AAK-PSD.

Nuk kam bërë asnjë ankesë në KQZ, dhe nuk do të bëj fare as tani. Por, më duhet ta them se në zgjedhje kishte vjedhje masive në votat e kandidatëve dhe kjo është shqetësuese për demokracinë dhe sistemin zgjedhor në vend.

Mjafton të shikoni rezultatet nga disa kuti të rinumëruara, për tu bindur në këtë. Megjithatë, nuk më mbetet zhig që s’jam në mesin e 14 deputetëve të zgjedhur në parlament.

Të jesh deputet, nuk do të thotë të marrësh pagë, por të kontribuosh për vendin tënd. Dhe, kontributin tim për Kosovën nuk do ta ndalë asnjëherë.

Nëse nuk je hajri i shtëpisë tënde, nuk do të jesh as i shoqërisë.

Jam i bindur se Ramush Haradinaj vazhdon të jetë lider që sot më shumë se kurrë i duhet Kosovës, por që forca e tij duhet të shtohet me ndryshime rrënjësore në parti.

Një përshëndetje e falënderim për të gjithë ju, nga Hamburgu i bukur. U pafshim për të mirë.

/Epoka e re/