Garda Revolucionare e Iranit ka nisur sulme me raketa ndaj objektivave të shumta “terroriste” në Siri dhe në rajonin autonom të Kurdistanit të Irakut.

Kështu njoftoi media shtetërore të martën e 16 janarit.

Sulmet shkatërruan “një seli spiunazhi” dhe një “mbledhje të grupeve terroriste anti-iraniane” në Erbil, kryeqyteti i Kurdistanit të Irakut, njoftoi agjencia zyrtare e lajmeve “IRNA”, duke cituar një deklaratë të Korpusit të Gardës Revolucionare Islamike (IRGC).

Katër persona u vranë dhe gjashtë të tjerë u plagosën në sulm, sipas Këshillit të Sigurimit të Kurdistanit të Irakut.

Biznesmeni i njohur Peshraw Dizayee ishte në mesin e disa civilëve që u vranë, tha Partia Demokratike e Kurdistanit.

IRGC goditi gjithashtu objektivat në Siri me raketa balistike, duke përfshirë “vendet e grumbullimit të komandantëve dhe elementëve kryesorë që lidhen me operacionet e fundit terroriste, veçanërisht grupin e Shtetit Islamik”, njoftoi shërbimi i tyre “Sepah News”.

Ai shtoi se sulmi në Siri ishte në përgjigje të sulmeve të fundit nga grupet terroriste që vranë iranianë në qytetet jugore të Kerman dhe Rask.

Shpërthime u dëgjuan në Aleppo dhe fshatrat e tij, ku “të paktën 4 raketa që erdhën nga drejtimi i Detit Mesdhe” ranë, tha Observatori Sirian për të Drejtat e Njeriut.

Më 3 janar, sulmuesit vetëvrasës goditën turmat e mbledhura pranë varrit të gjeneralit të nderuar të IRGC-së, Qasem Soleimani në Kerman, duke vrarë rreth 90 njerëz. Sulmi më vonë u mor përsipër nga IS.

Në dhjetor, të paktën 11 oficerë policie iraniane u vranë në një sulm në një stacion policie në Rask.

Grupi xhihadist Jaish al-Adl (Ushtria e Drejtësisë), e cila u formua në vitin 2012 dhe është në listën e zezë nga Irani si një grup “terrorist”, mori përgjegjësinë.

“Operacione spiune” izraelite

IRGC tha gjithashtu se kishte goditur “selinë e spiunazhit” të dyshuar izraelit në rajonin autonom të Kurdistanit të Irakut.

Sipas tyre selia kishte shërbyer si “qendër për zhvillimin e operacioneve të spiunazhit dhe planifikimin e veprimeve terroriste në rajon”, duke përmendur organizatën spiune të Izraelit Mossad.

Garda tha se sulmi ishte në përgjigje të sulmeve të fundit ndaj Iranit dhe “boshtit të rezistencës” të grupeve të lidhura me Iranin, të cilat kanë ngritur shqetësime për përhapjen e dhunës nga lufta e Izraelit në Gaza.

Tensionet rajonale janë rritur gjatë luftës midis Izraelit dhe grupit militant palestinez Hamas, duke tërhequr grupe të armatosura të mbështetura nga Irani në Liban, Irak, Siri dhe Jemen.