Shefi i deputetëve të LDK-së, Arben Gashi, ka reaguar pas publikimit të audio-incizimit të drejtorit të Televizionit Publik (RTK), Rilind Gërvalla, ku thotë se lajmin kundër Nacionales  dhe Periskopit e ka marrë pas konfirmimit nga AKI-ja.

Gashi ka thënë se ky është skandal dhe një sulm ndaj demokracisë dhe lirisë së mediave,

“Publikimi i lajmeve të rrejshme nga RTK-ja dhe deklarata e drejtorit Rilind Gërvalla, ku implikon AKI-në në këtë skandal, janë sulm i drejtpërdrejtë ndaj demokracisë dhe lirisë së mediave. Audioincizimi i publikuar dëshmon qartë se si AKI-ja, një institucion shtetëror i ndjeshëm, është përdorur për të fabrikuar lajme të rrejshme dhe për të sulmuar mediat që konsiderohen kundërshtare nga pushteti. Kjo është një shkelje e rëndë e etikës institucionale dhe një veprim i patolerueshëm që dëmton rëndë besimin e qytetarëve në institucionet publike. Kërkohet hetim urgjent dhe mbajtje përgjegjësie për këtë akt kriminal”, ka shkruar Gashi në “Facebook”.