Nën organizimin Ministrisë së Kulturës, Rinisë dhe Sportit, respektivisht Divizionit për Promovim, Edukim Joformal dhe Punësim të Departamentit të Rinisë, të premten është mbajtur takimi me karakter informues për Planin e Punës 2019-2020 me qëllim të angazhimit të partnerëve aktual dhe potencial të kësaj ministrie në zhvillimin dhe zbatimin e aktiviteteve të përbashkëta për vitet 2019-2020.

Gjatë këtij takimi janë nënshkruar dy marrëveshje bashkëpunimi me kolegjin “Ilira” dhe kolegjin “Riinvest”

Ministri i Kulturës, Kujtim Gashi, ka thënë se vitit 2018 ka qenë vit sfidues për ministrinë që ai drejton.

“Po e përmbyllim edhe një vit të shumë angazhimeve, rezultateve dhe të sukseseve të Ministrisë së Kulturës, Rinisë dhe Sportit por gjithsesi edhe një vit të sfidave dhe brengave që kanë pasur të rinjtë në Republikën e Kosovës. Padyshim që kjo konferencë që po realizohet sot ka një qëllim shumë të qartë që ngërthen në vete një bashkëpunim të ministrisë me shumë akterë, donatorë, organizata ndërkombëtare dhe shoqërinë civile”, ka thënë Gashi.

Ai ka theksuar ky është një moment shumë i mirë që planet që përfshijnë edukimin joformal për vitet 2019 dhe 2020 t’i planifikojmë bashkërisht.

“Sigurisht që kjo temë është shumë e rëndësishme jo vetëm për Kosovë por edhe në Evropë e përtej saj për faktin se të rinjtë tanë të cilët nuk ndjekin programe në shkolla dhe në Universitete të cilat janë të akredituara për programe të caktuara, e kanë mundësinë që të gjitha aftësitë e veta t’i realizojnë përmes edukimit joformal”, është shprehur ministri Gashi.

Më tutje, Gashi ka folur për sukseset e programeve të edukimit joformal të realizuara gjatë vitit 2018 ku kanë marrë pjesë rreth 2 mijë e 700 të rinj. “Dëshirojmë që përmes projekteve që i realizojmë në kuadër të departamentit të përfshijmë sa më shumë të rinj që jo vetëm të përfshihen si numër por edhe të përfitojnë nga këto programe të cilat do të financohen nga ky departament. Është fat i mirë që si Ministri e kemi ngritur buxhetin për këtë departament, për mbështetjen në programet rinore dhe po ashtu kemi edhe një lansim të një programi të ri për fondin rinor i cili është në kuadër të këtij departamenti”, ka thënë Gashi.

Gjatë fjalës se tij, Gashi ka përmendur edhe lidhjen e kontratave me 70 ndërmarrës të rinj, me ç’rast ka përgëzuar Departamentin e Rinisë, veçanërisht Sektorin e Edukimit Joformal që sipas tij ka ka bërë një punë jashtëzakonisht të mirë gjatë vitit që po e lëmë pas.

Ndërsa, udhëheqësi i Divizionit për Promovim, Edukim Joformal dhe Punësim, Kreshnik Xharra, ka bërë një prezantim përmes të cilit ka shpjeguar programet e planifikuara për zhvillimin e aftësive dhe kompetencave te të rinjtë përmes edukimit joformal dhe kultivimit të vlerave duke ndërtuar qëndrime për qytetari të përgjegjshme dhe për rritjen e pjesëmarrjes së të rinjve në programe të edukimit joformal, si rrugë alternative e avancimit në karrierë dhe përfitimit të kompetencave për të mësuar gjatë gjithë jetës.

/Epoka e re/