Kryeministri i Kosovës, Albin Kurti është pyetur nga gazetarët mbi “progresin e dialogut”, por ai ka thënë se me Serbinë ka marrëveshje dhe jo vetëm bisedime.

“Për besë, ne kemi marrëveshje tashmë, jo vetëm dialog”, ka thënë Kurti shkurt derisa po dilte nga Biblioteka Kombëtare.

Mbi përparimin në dialog, Kurti dje ka folur me ndihmëssekretarin amerikan e Shtetit për Evropën dhe Euroazinë, James O’Brien, dje në një takim në zyrën e tij.

Ndërsa më 24 tetor në Bruksel do të zhvillohen takimet e radhës në kuadër të dialogut Kosovë-Serbi në nivel të kryenegociatorëve nën ndërmjetësimin e emisarit të Bashkimit Evropian, Miroslav Lajçak.

Këshilltari i zëvendëskryeministrit Besnik Bislimi, Klisman Kadiu, kishte thënë për “Express” se në fokus të këtyre diskutimeve do të jetë zbatimi i Marrëveshjes së Ohrit, ndërsa tha se pala kosovare do të vazhdojë të jetë konstruktive.

“Javën e ardhshme, më 24 tetor, do të mbahen takimet e radhës në kuadër të procesit të dialogut në Bruksel, në nivel të kryenegociatorit. Në tërësi, fokus i diskutimeve do të jetë rruga përpara në zbatimin e Marrëveshjes Bazike dhe Aneksit të saj të Ohrit. Kosova do të vazhdojë të jetë konstruktive dhe e angazhuar pozitivisht në proces”, ka thënë ai.

Formati i takimeve do të varet nga diskutimet atje. Megjithatë, herën e fundit kur Besnik Bislimi dhe Petar Petkoviq, kryenegociator i palës serbe, ishin në Bruksel nuk ka pasur takim trepalësh më 17 shtator kur janë zhvilluar takimet.