Zëvendëskryeministrja dhe ministrja e Punëve të Jashtme dhe Diasporës, Donika Gërvalla, priti në takim kortezie ambasadoren e re jo rezidente të El Salvadorit në Kosovë, Rhina Bardi, të cilën e uroi për fillimin e mandatit të saj diplomatik.

Gjatë takimit, ministrja Gërvalla theksoi se forcimi i lidhjeve dypalëshe ndërmjet Kosovës dhe El Salvadorit mbetet një prioritet, me synimin për të krijuar një partneritet të qëndrueshëm në fusha me interes të ndërsjellë.

Ajo riafirmoi rëndësinë e diplomacisë kulturore dhe shkëmbimeve akademike si mjete kyçe për forcimin e mëtejshëm të marrëdhënieve mes dy vendeve.

Në këtë kontekst, u nënvizua potenciali i Kosovës, veçanërisht rinia dinamike dhe zhvillimi ekonomik në rritje, si faktorë kyç për ndërtimin e partneriteteve që kontribuojnë në prosperitetin e përbashkët.

Po ashtu, ministrja Gërvalla dhe ambasadorja Bardi diskutuan për rëndësinë e krijimit të mundësive të reja për zhvillim dhe bashkëpunim ndërmjet institucioneve dhe sektorit privat të të dyja vendeve.