Një sulm vetëvrasës goditi një restorant në qytetin lindor Beni të Republikës Demokratike të Kongos të shtunën, duke vrarë të paktën pesë persona si dhe veten e tij, thanë zyrtarët.

Shpërthimi ndodhi në lokalin INBOX ku njerëzit po festonin Krishtlindjet, sipas një zyrtari të sigurisë në Beni.

Sulmi shënon dhunën e fundit në një rajon ku forcat kongoleze dhe ugande kanë nisur një fushatë kundër islamistëve të dyshuar.

“Vetëvrasësi, i penguar nga rojet e sigurisë për të hyrë në një lokal të mbushur me njerëz, aktivizoi bombën në hyrje të lokalit,” ka thënë në një deklaratë zëdhënësi i guvernatorit rajonal, gjenerali Ekenge Sylvain.

Gjashtë persona vdiqën në shpërthim dhe 14 u plagosën, duke përfshirë dy zyrtarë lokalë, shtoi ai, shkruan CNN, transmeton Klankosova.tv.

Dy gra dhe një vajzë adoleshente ishin në mesin e të vrarëve, tha zyrtari i sigurisë.

Sylvain tha se kryengritësit nga Forcat Aleate Demokratike (ADF), një grup i rreshtuar me Shtetin Islamik, kishin aktivizuar një “celulë gjumi” në Beni për të synuar qytetarët, por ai nuk dha prova që i lidhnin ata me shpërthimin.

ADF nuk mori menjëherë përgjegjësinë për sulmin.