Klaus Gjasula në një konferencë për shtyp pak ditë para duelit ndaj Polonisë. Mesfushori që aktivizohet në Bundesliga 2 me Darmstad, foli për tema të ndryshme dhe për strategun e ri, Sylvinho.

“Gjendja fizike është në rregull. Luajta 20 minuta në ndeshjen e fundit, isha ok, por të shohim nëse do të jem në gjendje të luaj nga minuta e parë. Do të jap maksimumin nëse luaj, dua të ndihmoj shokët. Aktivizimi në mbrojtje? Po, do të isha gati të luaja edhe në qendër të mbrojtjes. Jam mësuar me atë rol. E vendos trajneri, por jam gati të luaj në mbrojtje. Kemi një frymëmarrje të re, trajneri ka shumë energji. Jemi optimistë që do të bëjmë mirë”, ka thënë Gjasula.

“Sylvinho? Çdo trajner ka idetë e veta për të luajtur futboll. Kemi një skemë të re, të gjithë janë dakord dhe do të japin maksimumin. Trajneri na është dukur shumë mirë në ditët e para. Me emocion dhe energji, ka qenë shumë mirë deri tani. Sylvinho na ka treguar idetë e veta. Në të ardhmen do të bëhet më mirë”, ka shtuar Gjasula, i cili më pas bëri të qartë se kuqezinjtë do të janë të kënaqur edhe me një pikë nga sfida ndaj polakëve. “Ne shkojmë në Poloni për të kapur maksimumin, por edhe një pikë është mirë. Të dy ndeshjet me Poloninë kanë treguar se mund të marrim pikë. Ata kanë kualitete të mira. Do të jemi shumë të përqendruar që të mos bëjmë gabime. Kjo është ajo që ka më shumë rëndësi”, ka deklaruar Gjasula.