Është gjetur e gjallë 26-vjeçarja, Egzona Ferati nga Komuna e Skenderajt, e cila ditë më parë ishte raportuar e zhdukur.

Kryetari i Skenderajt, Bekim Jashari, ka thënë se ajo është gjetur në fshatin Gllanasellë të Drenasit dhe se ekipi mjekësor do t’i japë ndihmën e parë.

“Lajm i mrekullueshëm! Egzona Islam Ferati është gjetur e gjallë, në fshatin Gllanasellë. Tani ekipi mjekësor do të ofrojë ndihmën e parë dhe do të na njoftojë për gjendjen e saj shëndetësore.

Një falënderim i madh për të gjithë qytetarët e vullnetit të mirë që sot kërkuan dhe gjetën Egzonen”, ka shkruar Jashari në llogarinë e vet në “Facebook”.

Ajo është sjellë në Qendrën Emergjente në Drenas, ku më pas do të dërgohet për trajtim në Qendrën Klinike dhe Universitare të Kosovës (QKUK).