Një person është gjetur i shtrirë në trotuar me lëndime në kokë, pasditen e së dielës në Mitrovicë.

Policia ka njoftuar se viktima është dërguar në spitalin e Mitrovicës, ku nga mjeku kujdestar është konstatuar vdekja e tij.

Ndërkohë, në raportin ditor të policisë është bërë me dije se në vendngjarje kanë dalë njësitë përkatëse.

Sipas policisë, me vendim të prokurorit trupi i pajetë dërgohet në Institutin e Mjekësisë Ligjore (IML) për obduksion.

“Raportohet se viktima mashkull kosovar është gjetur i shtrirë në trotuar me lëndime në kokë. Viktima është dërguar në spitalin e Mitrovicës, ku mjeku kujdestar ka konstatuar vdekjen e viktimës. Në vend ngjarje kanë dalë njësitet përkatëse. Me vendim të prokurorit trupi i pa jetë dërgohet në IML për obduksion”, ka njoftuar policia.