Shishja më e kushtueshme e vodkës në botë, e vjedhur të martën nga një lokal, u gjet e boshatisur në një zonë ndërtimi në Kopenhagen.

Shishja kushton 1.3 milion dollarë, përbëhet nga ar dhe argjent dhe ka një kapak të dekoruar me diamante.

Ajo i ishte dhënë me qira një lokali në kryeqytetin danez, i cili shfaqte një koleksion vodkash. Pamje të xhiruara nga kamerat e sigurisë treguan të mërkurën momentin kur një hajdut rrëmbeu shishen e vodkës Russo-Baltique, duke u larguar më pas nga bari. Shishja u gjet e padëmtuar, siç bëri të ditur policia daneze. Brian Ingberg, pronari i lokalit ‘Cafe 33’, tha se vlera e shishes mbetej e pandryshuar, edhe pse tani ishte bosh, transmeton tch.

“Fatmirësisht – tha ai – kemi ende vodka nga ajo që gjendej në shishe, kështu do ta rimbushim”. Prodhuesi rus i makinave luksoze, Russo-Baltique tha se e kishte krijuar vodkën për të shënuar 100 vjetorin e fabrikës. Pjesa e përparme e saj është e dekoruar me lëkuëe dhe përfshin logon e kompanisë. Kapaku ka formën e shqiponjës perandorake ruse dhe është e praruar me diamante. Shishja është përfshirë edhe në një episod të serialit “House of cards”, si dhuratë nga presidenti rus për homologun e tij amerikan.