Gjermania i ka kërkuar Ukrainës të mos pranojë propozimin e fundit për paqe të presidentit amerikan, Donald Trump, i cili ka sugjeruar që Kievi të heqë dorë nga territore të mëdha në këmbim të një armëpushimi me Rusinë.

Ministri gjerman i Mbrojtjes, Boris Pistorius, ka deklaruar të dielën për transmetuesin publik “ARD” se një marrëveshje e tillë do të ishte e barasvlershme me një “kapitullim”.

Sipas tij, ndonëse Ukraina mund të jetë e detyruar të bëjë disa kompromise territoriale për të arritur një armëpushim të qëndrueshëm, ajo nuk duhet të pranojë kushtet e ofruara nga Trumpi.

“Ukraina padyshim e di se mund t’i duhet të heqë dorë nga një pjesë e territorit për të arritur një armëpushim të qëndrueshëm që bazohet në mirëbesim,” tha Pistorius. “Por ata sigurisht nuk duhet të pranojnë një marrëveshje sipas propozimit të fundit nga presidenti amerikan”, ka thënë ai.

Ai ka thënë se oferta e Trumpi nuk sjell ndonjë vlerë të shtuar për Ukrainën dhe se një marrëveshje e tillë mund të ishte arritur edhe një vit më parë, në kushte të papranueshme.

Sipas raportimeve të mëparshme nga “Axios”, propozimi i Trump përfshin: njohjen e Krimesë si pjesë e Rusisë, njohjen jozyrtare të kontrollit rus mbi territoret e pushtuara pas vitit 2022, ndalimin e anëtarësimit të Ukrainës në NATO dhe heqjen e sanksioneve kundër Rusisë të vendosura që nga viti 2014.

Deklaratat e Pistorius vijnë në një kohë kur në Uashington po diskutohet seriozisht mundësia e vazhdimit të rolit ndërmjetësues në konflikt.

Sekretari i Shtetit, Marco Rubio, ka deklaruar se administrata Trump po shqyrton nëse palët janë mjaftueshëm afër një marrëveshjeje për të justifikuar një investim të mëtejshëm diplomatik. Megjithatë, Rubio nuk ka përcaktuar një afat të qartë për arritjen e një përparimi.