Ministri Federal i Mbrojtjes, Boris Pistorius, ka thënë se rikthimi i shërbimit të detyrueshëm ushtarak është i mundur. Politikani socialdemokrat i ka thënë të përjavshmes “Die Zeit” se heqja e tij kishte qenë gabim.

“Rivendosja e shërbimit të detyrueshëm ushtarak vërtet që tani do të çonte në probleme të mëdha kushtetuese dhe strukturore. Megjithatë, diskutimi për këtë do të marrë vrull duke pasur parasysh situatën aktuale të politikës së sigurisë, ka thënë ministri gjerman i Mbrojtjes.

Pistorius ka theksuar se gjermanët në përgjithësi duhej të jenë gati për një ndryshim në mentalitet. “Kohët e përfitimit nga paqja dhe të shpenzimeve të ulëta të mbrojtjes kanë mbaruar”, ka thënë ai.

Pistorius, ka thënë se “tani duhet të jemi në gjendje të pengojmë përsëri një agresor të mundshëm – pavarësisht nëse u pëlqen apo jo kjo të gjithëve”.

Në këtë kontekst, ministri i Mbrojtjes, ka përsëritur edhe formulimin e tij, që ka ngjallur polemika se Bundeswehr duhet të jetë i “aftë për luftë”.

Debat për rekrutimin

Shërbimi i detyrueshëm ushtarak ishte temë në konferencën e Bundeswehr-it pothuajse një muaj më parë. Shoqata e Bundeswehr-it e kishte përshkruar rifutjen si një “mënyrë të fundit” për rekrutimin e personelit. Por në përgjithësi duhet të ketë edhe kushte më tërheqëse. Përballë kërcënimeve të reja dhe komplekse, është e rëndësishme që të rekrutohet shpejt më shumë personel për trupat. Kohët e fundit, gjithnjë e më shumë janë ngritur dyshime nëse Bundeswehr-i do ta arrijë objektivin e tij të deklaruar për 203 mijë  burra dhe gra me uniformë deri në vitin 2031.

Shërbimi i detyrueshëm ushtarak është pezulluar në Gjermani në korrik 2011, pas 55 vjetësh, nën ministrin e atëhershëm të Mbrojtjes Karl-Theodor zu Guttenberg (CSU). Në praktikë kjo ka çuar në një eliminim të kryerjes shërbimit ushtarak dhe të shërbimit civil në komunitet. /DW