Gazetari gjerman i “Frankfurter Allgemeine Zeitung”, Michael Martens, ka paralajmëruar një shkrim të ish-ambasadorit kosovar në Gjermani, Beqë Cufajt, që do të publikohet në edicionin e fundjavës të FAZ-it.

Martens ka thënë se ajo që është shkruar nga Cufaj, nuk do t’u pëlqejë disave, sidomos në Prishtinë.

Beqë Cufaj, ish-ambasador i Kosovës në Gjermani, e ka një shkrim në numrin e radhës të “Frankfurter Allgemeine Sonntagszeitung” (edicionin e fundjavës) që disa në Prishtinë nuk do ta pëlqejnë, sidomos rekomandimet e tij se si duhet të sillet Berlini ndaj (kundër?) Kryeministrit Albin Kurti”, ka shkruar Martens në “Twitter”.

Siç e ka transmetuar gazetari gjerman, Cufaj ka shkruar se si Gjermania ishte shteti që e ka përkrahur kryeministrin Albin Kurti që të vijë në pushtet dhe se tani duhet ta përdorë ndikimin e saj te ai.

“Sipas Beqë Cufajt, Gjermania është ‘sponsori kryesor’ i Kurtit dhe ka punuar fort ta sjellë atë në pushtet, kështu që ajo duhet ta shfrytëzojë tani ndikimin e saj që të ushtrojë presion ndaj tij. Shumë i interesuar të shoh si do të funksionojë”, ka shkuar gazetari gjerman.

Martens përcjellë zhvillimet në Ballkanin Perëndimor dhe raporton kryesisht për negociatat e Kosovës me Serbinë dhe çështjet rreth tyre.