Ministri i Jashtëm gjerman, Heiko Maas, ka deklaruar se shteti i tij e dëshiron normalizimin e marrëdhënieve me Turqinë.

“Është e qartë se ne duam një normalizim të mëtejshëm të marrëdhënieve tona reciproke”, tha Maas.

Ai pohoi se Gjermania, një vend me tre milionë qytetarë turq, e ka interes jetik normalizimin e marrëdhënieve me shtetin turk.

Maas foli edhe për planin e presidentit turk Rexhep Tajip Erdogan për të vizituar Gjermaninë muajin e ardhshëm.

Në një intervistë për të përditshmen gjermane Kolner Stadt-Anzeiger, ministri tha se të gjitha temat që janë diskutuar për një kohë do të hidhen përsëri në tryezë.

Ministri Maas bëri me dije se aktivitetet e ushtrisë turke në pjesën veriperëndimore të Sirisë do të diskutohen gjithashtu gjatë vizitës së mundshme të Erdogan në shtetin e tij.

“Pra, ka ende shtetas gjermanë të cilët janë në burg në Turqi. Nuk mund ta kuptojmë pse është kështu”, ka thënë ministri i jashtëm gjerman.

Mediat gjermane raportuan se Erdogan do të vizitojë Gjermaninë në fund të shtatorit, por akoma asgjë nuk është konfirmuar nga Anakaraja zyrtare.