Komuna e Gjilanit me homazhe në varrezat e dëshmorëve dhe para bustit të hroit të kombit, Abdullah Tahiri, i cili ishte organizator në shumë aksione për liri dhe pavarësi njëherit prijës i themelimit të UÇK-së, Zona Operative e Karadakut.

Kryesuesja e Kuvendit të Komunës, Shpresa Kurteshi-Emini, ka thënë se institucionet komunale dhe përfaqësimet tjera të niveleve të ndryshme dhe qytetarë të shumtë janë në kushte pandemie duke i dhënë nderimet veprës që heroi Abdullah Tahiri bëri bashkë me vargun e gjatë të heronjëve, dëshmorëve, martirëve dhe të rënëve për luftën për liri.

Ajo tha, gjithashtu, se nderimi më i mirë për dëshmorët është angazhimi i përbashkët dhe pa dallime në krijimin e një jete më të mirë, një shprese për të jetuar dinjitetshëm të gjithë qytetarët e Kosovës.

Ndërsa, Ahmet Isufi, ish- komandant i UÇK-së në Zonën Operative të Karadakut, ka thënë se nderimi i veprës së lavdishme të komandantit të parë të UÇK-së për ZOK-ut, është sa krenari për lavdinë që ai ka, në të njejtën kohë edhe dhimbje e madhe.

Ai tha se Abdullahu ishte njeriu kryesor i të gjitha organizimeve që kishin qëllim kombëtar, lirinë, pavarësinë dhe ndërtimin e shtetit të fuqishëm të Kosovës.

“Sot përkujtojmë veprën e Abdullahut, Enver Topallit, Arben Ramadanit dhe të gjithë dëshmorëve dhe të rënëve në këtë ditë, që në saje të sakrificës së tyre, ne jemi sot shtet i pavarur dhe pretendent për tu shvilluar karshi shteteve tjera”, ka thënë mes tjerash Isufi.