Berat Gjimshiti ka parë se si ëndrrat e Atalantës për një edicion si protagoniste në Ligën e Kampioneve të shuhen me një humbje 3-1 në shtëpi përballë Club Brugge. Një humbje e papritur që ka lënë një zhgënjim të madh, siç e pranoi pas ndeshjes mbrojtësi shqiptar.

“Është e vështirë të gjesh fjalët, komplimente atyre. Në pjesën e parë kanë bërë tre gola në kundërsulm. Duke shënuar menjëherë komplikuan ndeshjen tonë. Gjëja më e rëndësishme ishte shpirti. Nuk u dorëzuam, tani duhet të rinisemi dhe mendojmë për kampionatin. Ata kanë një skuadër të mirë, luajnë mirë futboll. Na vendosën më shumë në vështirësi në ndeshjen e parë se sa në të dytën, ku ishin vdekjeprurës. Në një ndeshje kaq të rëndësishme nuk mund të shkosh në dizavantazh 0-3 në fund të pjesës së parë. Tani duhet të karikojmë bateritë, të mësojmë nga gabimet dhe të rinisemi”, ka thënë mbrojtësi shqiptar për “Sky Sport” pas ndeshjes.