![](https://www.epokaere.com/wp-content/uploads/2021/11/gjini-2.jpg)
Gjini: Kosova këtë vit do të shkojë në zgjedhje të parakohshme
Vonesa të pa justifikueshme, ngecje në marrjen e vendimeve e ndarje buxhetore jo e drejtë konsiderohet që po e karakterizojnë bashkëpunimin e nivelit qendror me atë lokal të Komunës së Gjakovës.
Kryetari i kësaj komune, Ardian Gjini në një intervistë për “Kosovapress” e ka vlerësuar jo të mirë bashkëpunimin me nivelin qendror, për çka shpreson se këtë vit qeveria do të merr më me seriozitet punët e ndërlidhura me komunën.
Ndërsa si nënkryetar i Aleancës për Ardhmërinë e Kosovës (AAK), Gjini beson që gjatë këtij viti Kosova do të shkojë në zgjedhje të parakohshme, për çka pret edhe rezultate më të mira për AAK-në.
“Unë po besoj që nëse i kemi parasysh të gjitha rrethanat që janë krijuar në Kosovë, duke i futur në kalkulim edhe bindjet politike të njerëzve dhe idetë që i shohim, gjasat janë që në vitin 2024 do të kemi zgjedhje të parakohshme… Pres rezultatet më të mira për Aleancën, patjetër, më të mirat të mundshme”, ka thënë Gjini.