Sekretari i Partisë Demokratike të Kosovës (PDK), Betim Gjoshi, ka akuzuar presidenten Vjosa Osmani dhe kryeministri Albin Kurti për shkatërrim të rendit kushtetues të Kosovës.

Gjoshi, i cili më herët ka qenë anëtar i KQZ-së, ka kritikuar vendimin e sotëm të KQZ-së që ka vendosur 21 prilli si datë për votim për largimin e kryetarëve aktual në veri.

Gjoshi ka shkruar në “Facebook” se këtë datë është dashur ta caktojë presidentja Osmani dhe jo KQZ-ja.

“Albin Kurti, Vjosa Osmani dhe Lëvizja Vetëvendosje, tashmë po shkatërrojnë edhe rendin kushtetues të Republikës së Kosovës. Kushtetuta e Kosovës e ka thënë qartë: Presidenti shpallë zgjedhje, KQZ-ja organizon zgjedhje. Por, sot ndodhi anomalia më e madhe që rrënon përfundimisht hierarkinë institucionale: KQZ shpallë zgjedhje, KQZ organizon zgjedhje”, ka shkruar Gjoshi.

Ai ka treguar se anëtarët e PDK-së në KQZ nuk e kanë përkrahur këtë vendim.

“Albin Kurti dhe Vjosa Osmani, që e kanë çuar shtetin e Kosovës buzë greminës, tashmë edhe zyrtarisht po i rrezikojnë proceset zgjedhore. PDK, është opozitë e vërtetë që nuk i nënshtrohet diktatit të pushtetit për të shkatërruar rendin kushtetues të Republikës së Kosovës dhe dy anëtarët e PDK-së në KQZ mbajtën qëndrim dinjitoz, institucional dhe kushtetues”, ka shkruar Gjoshi.