Në Gjykatën Speciale në Hagë, trupi gjykues në çështjen ndaj Hashim Thaçit, Kadri Veselit, Rexhep Selimit dhe Jakup Krasniqit ka marrë vendim që të mos vendos masa kufizuese lidhur me vizitat private tek katërshja e UÇK-së.

Në vendimin e datës 9 shkurt 2024, kryetari i trupit gjykues, Charles Smith III ua ka rikujtuar liderëve të UÇK-së, në veçanti Thaçit dhe Selimit për detyrimin që kanë për të mos iu zbuluar personave të tretë informacione konfidenciale.

“Për arsyet e lartpërmendura, paneli përmes kësaj: kujton të akuzuarit, në veçanti, zotërinjve Thaҫi dhe Selimi për detyrimin e tyre për të mos zbuluar palëve të treta të paautorizuara asnjë informacion konfidencial dhe/ose informacion që mund të çojë në identifikimin e dëshmitarëve të mbrojtur. Urdhëron sekretarin që t’u kujtojë vizitorëve në objektet e paraburgimit se ata nuk duhet të diskutojnë ose të marrin pjesë në diskutimet e informacioneve konfidenciale që kanë të bëjnë me procedurat në KSK me një të paraburgosur, duke përfshirë informacionin që ka të bëjë me identitetin e dëshmitarëve të mbrojtur”, është thënë në vendim.

Nëpërmjet këtij vendimi, urdhërohen avokatët kryesorë të liderëve të UÇK-së që të ua kujtojnë anëtarëve të ekipit të tyre detyrimet që kanë në lidhje me informacionet konfidenciale.

“Urdhëron avokatin kryesor për të gjithë të akuzuarit që t’u kujtojë anëtarëve të ekipit detyrimet e tyre në lidhje me informacionin konfidencial. Urdhëron regjistruesin që të njoftojë menjëherë panelin në rast se ajo nxjerr një vendim që vendos kufizime ose refuzon një kërkesë për një vizitë private dhe udhëzon sekretarin, ZPS-në, mbrojtjen e Selimit dhe mbrojtjen e Thaçit që të dorëzojnë një version publik të redaktuar të dosjeve të tyre përkatëse ose të kërkojnë riklasifikimin e tyre si publik jo më vonë se e premtja, 16 shkurt 2024”, është thënë në vendimin e Speciales.
Në arsyetimin e këtij vendimi është thënë se paneli ka refuzuar që të vendoste ndonjë masë kufizuese lidhur me vizitat private. Andaj, ka vlerësuar se nuk ka indikacione që këto vizita të jenë përdorur për qëllime tjera.
“Paneli rikujton se, në vendimin e tij, ai refuzoi të miratonte ndonjë masë kufizuese në lidhje me vizitat private. Në lidhje me këtë, paneli konstatoi se ‘nuk ka indikacione se këto vizita (private) janë përdorur për t’u përfshirë në veprime të pahijshme në sjelljen e deritanishme’ dhe se paneli ‘nuk do të ngurrojë të vendosë kufizime shtesë për vizitat private nëse ndonjë palë përfshihet në sjellje të pahijshme gjatë vizitave të tilla (private”, është thënë në vendim, raporton “Betim për Drejtësi”.

Ndërsa lidhur me kërkesën e ZPS-së që të gjitha vizitat private të Thaçit dhe Selimit të monitorohen, paneli ka theksuar se ato janë të rëndësishme sa i takon të drejtave të liderëve të UÇK-së si dhe nuk ka bazë për të vendosur masa kufizuese ndaj tyre.

“Lidhur me kërkesën e ZPS-së që faktet dhe rrethanat tani para Panelit të arsyetojnë monitorimin aktiv të të gjitha vizitave private te z. Thaçi dhe Selimi, Paneli thekson si në vijim. Së pari, paneli rithekson se përderisa Vizitat Private janë veçanërisht të rëndësishme nga pikëpamja e të drejtave themelore të të akuzuarve, ato gjithashtu mund t’u nënshtrohen masave të kufizimeve kur është e nevojshme dhe në proporcion me nevojën për të mbrojtur një interes publik konkurrues. Së dyti, asnjë nga vizitat e përfshira në këtë Vendim nuk ishin Vizita Private. Në vend të kësaj, të gjitha ishin vizita jo të privilegjuara, të cilat tashmë i nënshtrohen masave kufizuese të vendosura nga paneli për z. Thaçi, Selimi dhe Veseli. Prandaj, nuk ka asnjë bazë në këtë fazë që Paneli të urdhërojë që masa të ngjashme të vendosen në lidhje me vizitat private. Megjithatë, Paneli e ka bërë të qartë se çdo keqpërdorim i privilegjeve lidhur me vizita të tilla do t’i nënshtrohet një përgjigje adekuate”, është thënë në vendim.

Ndryshe, Zyra e Prokurorit të Specializuar (ZPS), më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.