Ish-drejtori në detyrë i Inteligjencës Kombëtare në ShBA, Richard Grenell është planifikuar të flasë në Iowa këtë javë, mes spekulimeve të hershme që po bëhen se ai llogaritet si njëri prej mundësive për postin e zëvendëspresidentit të vitit 2024 për ish-presidentin Donald Trump.

Grenelli është planifikuar të flasë të mërkurën përpara Klubit Konservativ Westside në Urbandale të Iowa-s, ka njoftuar klubi në faqen e zyrtare në “Facebook”.

Në llogarinë e vet në “Twitter”, Grenelli ka shkruar se ai gjithashtu do t’i drejtohet Qarkut Dallas të enjten dhe se do të flasë për “strategjinë e parë të Amerikës së Donald Trump”.

Trumpi nuk ka thënë nëse ai do të kandidojë për president të ShBA-së në vitin 2024, por përgjigja e tij standarde kur është pyetur ishte se mbështetësit e tij do të jenë “shumë të lumtur” me vendimin e tij.

Në një artikull të nëntorit për kandidatët e mundshëm, “Politico.com” ka raportuar se Grenelli “është “rritur” gjithashtu në vlerësimin e njerëzve të brendshëm të Trump”.

“Trump e do Ricun dhe ndryshe nga Mike Pompeo apo dikush tjetër, ai nuk ka interes të kandidojë për president. Kjo është një çështje e madhe për Trumpin”, i ka thënë “Politico”-s një këshilltar i Trumpit.

Paraqitjet si ato të planifikuara në Iowa mund të nxisin më shumë spekulime se Grenell mund të jetë i gatshëm të jetë kandidati i Trumpit në vitin 2024.

Iowa tradicionalisht ka qenë shteti i parë që ka mbajtur garë për nominim presidencial. Iowa do të mbajë grupet e para në vend në vitin 2024, kanë njoftuar udhëheqësit e GOP-it në prill.

Gjithashtu, Grenelli ka bërë fushatë për Adam Laxalt përpara zgjedhjeve paraprake republikane të Senatit të ShBA-së në Nevada javën e kaluar. Laxalt, i cili ishte mbështetur nga Trumpi, ka mbizotëruar në zgjedhje.

55-vjeçari ishte ambasador i Shteteve të Bashkuara të Amerikës në Gjermani, dhe nën drejtimin e Trumpit ka shërbyer si i dërguar special presidencial për negociatat mes  Kosovës e Serbisë.