I dërguari special i Shtëpisë së Bardhë për dialogun midis Prishtinës dhe Beogradit, Richard Grenel, ka deklaruar se ajo që ai po bën është të përqendrohet në marrëdhëniet ekonomike dhe krijimin e një “zone mini-Shenzhen”.

“Ne mendojmë se është një ide shumë e mirë, të krijojmë vende të reja pune në rajon dhe të përpiqemi të lidhim vendet ekonomikisht, komercialisht,” ka thënë Grenelli në një intervistë për televizionin amerikan “Newsmax”.

Ai ka shtuar se vetëm pas kësaj, çështjet politike mund të jenë në rendin e ditës, si një hap i dytë.

Zona speciale ekonomike Shenzhen është themeluar në maj të vitit 1980 dhe është zona e parë e veçantë ekonomike në Kinë, pas së cilës u krijuan edhe pesë zona të veçanta ekonomike.

Shumë prodhues të orientuar nga eksporti prodhojnë dhe mbledhin mallra në atë zonë.

Banka Botërore deklaron në një raport se karakteristikat e asaj zone janë autonomi e gjerë politike dhe institucionale, partneriteti publik-privat dhe investime të mëdha direkte të huaja, si dhe investime të mëdha të diasporës kineze.

Grenelli nuk e ka shpjeguar se çfarë do të thoshte një zonë e tillë në rastin e të ashtuquajturave marrëdhënie ekonomike Kosovë-Serbi, pavarësisht nëse bëhet fjalë për një lloj bashkimi ekonomik ose thjesht marrëdhënie të ngushta ekonomike.

Ai gjithashtu ka thënë se “disa të ashtuquajtur ekspertë” i bënin presion të dy palëve për të diskutuar vetëm çështje politike.

“Ne vendosëm të përfshihemi, sepse ekziston një histori e gjatë me kaq shumë ekspertë, të ashtuquajtur ekspertë, të cilët vetëm i shtynë ato në probleme politike, duke injoruar ato ekonomike”, ka thënë Grenelli.

Ai ka theksuar se të rinjtë në Kosovë dhe Serbi kanë nevojë për punë dhe shpresë.

“Kur fola për problemet e të rinjve në Kosovë dhe komunitetin e biznesit, si dhe në Serbi, ishte e qartë se ata duan zhvillim ekonomik, vende pune dhe duan shpresë”, ka thënë Grenelli.

Grenelli e ka quajtur historike marrëveshjen e arritur në trafikun ajror, duke thënë se ajo u nënshkrua për herë të parë në 21 vjet.

Sipas “Newsmax”, Prishtina do të përfaqësohet në Uashington nga presidenti Hashim Thaçi dhe kryeministri Avdullah Hoti, ndërsa Beogradi nga presidenti Aleksandër Vuçiq dhe kryeministrja Ana Brnabiq.

Përbërja e delegacionit që do të shkojë në takim në Shtëpinë e Bardhë nuk është njoftuar ende në Beograd.