![](https://www.epokaere.com/wp-content/uploads/2024/08/gruda-1.jpg)
Gruda i PDK-së: Vetëvendosje ka dorë në moszbardhjen e rastit Dehari
Anëtari i Kryesisë së Partisë Demokratike të Kosovës, Përparim Gruda i ka kërkuar Qeverisë që të ndalë “lojërat dhe propagandën politike” me rastin Dehari, teksa ka thënë se Vetëvendosje ka dorë në moszbardhjen e këtij rasti.
Gruda, në një konferencë për medie, e ka quajtur “show politik” dhe vazhdimësi të keqpërdorimit të rastit Dehari, konferencën e Lëvizjes Vetëvendosje të hënën para Prokurorisë Speciale.
“Janë bërë më shumë se tri vite që Lëvizja Vetëvendosje është në pushtet dhe nuk ka bërë asnjë hap për të zbardhur të vërtetën e Rastit Dehari, përkundër premtimeve për zbardhjen e tij sa ishin në opozitë. Përkundrazi, gjatë qeverisjes së Vetëvendosjes janë zhdukur e janë kthyer pjesërisht mostrat e Astrit Deharit dhe është djegur dy herë Instituti i Mjekësisë Ligjore, ku ato ruheshin. Po ashtu, ka disa muaj që LV-ja po e pengon themelimin e Komisionit Hetimor Parlamentar lidhur me zjarrin në Institut dhe humbjen e mostrave”, ka thënë ai.
Gruda ka ngritur një sërë pyetjesh lidhur me këto ngjarje, duke thënë se janë problemi themelor i pushtetit.
“Kush i zhduki mostrat e Astrit Deharit në Institut? Kush i ktheu mostrat e Astrit Deharit në Institut? Kush e dogji Institutin? Si ndodhi që mostrat e Deharit u zhdukën në mars të 2023-tës dhe po në atë muaj ndodhi zjarri i parë në Institut? Pas zjarrit të dytë u dogj sistemi i kamerave në IML dhe për katër ditë me radhë nuk kishte fare vëzhgim të dhomës së dëshmive ku mbahen mostrat e Deharit. Si është e mundur që pikërisht në këtë interval kohor 4 ditor të gjendeshin dhe të ktheheshin mostrat e Astrit Deharit në Institut? Cilat janë masat që janë marrë ndaj personave përgjegjës për monitorimin e kamerave dhe atyre që kanë çelësin për hyrje në Dhomën e Dëshmive në IML? Pse po e pengoni themelimin e Komisionit Hetimor për Rastin Dehari?”, ka pyetur Gruda.
PDK-ja ka kërkuar që qeveria t’i kthehet sa më parë punës në zbardhjen e së vërtetës për Rastin Dehari.
“Po ashtu, dua t’i siguroj të gjithë qytetarët e Kosovës se ky rast nuk do të mbetet i pazbardhur dhe se njerëzit e këtij pushteti që po e pengojnë zbardhjen e tij një ditë do të japin llogari para drejtësisë”, ka thënë Gruda.