Guvernatori i Bankës Qendrore të Kosovës, Ahmet Ismaili, të mërkurën, do të raportojë në Komisionin Parlamentar për Buxhet, pas rregullores së këtij institucioni të pavarur, e cila ndër të tjera ndaloi edhe përdorimin e valutës shtetërore serbe, Dinarin, për shit-blerje dhe transaksione financiare në territorin e Kosovës.

Raportimi i Ismailit në këtë komision vije pas kërkesës së opozitës.

Deputeti i Lidhjes Demokratike të Kosovës, Avdullah Hoti, potencoi se Ahmeti ndër të tjerë në Komision do të pyetet lidhur me “pjesëmarrjen e tij të pakuptimtë dhe pa asnjë autorizim ligjor në dialog në Bruksel për rregulloren për përdorimin e valutave të huaja në Kosovë”.

“Edhe pse BQK-ja është institucion i pavarur kushtetues, Qeveria e detyroi atë të përfshihet në dialog në mënyrë joligjore”, ka shkruar Hoti në platformën sociale, Facebook.

Shqetësues, sipas Hotit, mbetet fakti se Qeveria dhe BQK-ja nuk pranuan kërkesat e aleatit kryesor të Kosovës për shtyrje të zbatimit të rregullores.

“Por, pranuan të ulen në tavolinë me palën serbe me kërkesë të ndërmjetësit”.