Haki Abazi, anëtar i AAK-së, ka thënë se më 15 prill, në ditën kur presidentja Vjosa Osmani e ka caktuar datën për seancën konstituive të Kuvendit të Kosovës, do të arrihet konsensus mes partive politike, PDK, LDK e AAK.

“Jam i bindur se më 15 prill do të arrihet konsensusi brenda partive PDK, LDK, AAK. Mendoj që pjekuria e liderëve politikë do vijë në shprehje përballë një rreziku të jashtëzakonshëm të prerjes së fatit të Kosovës në procese të rëndësishme ndërkombëtare pa qenë ne prezentë aty. Nuk mund të akuzojmë Evropën e Amerikën historikisht që na ka bërë këtë e atë, përderisa ne e eliminojmë veten. Sot jemi të eliminuar. Me Kurtin nuk jemi as në Bruksel e as në ShBA duke e mbrojtur interesin tonë. Edhe sikur të jetë Kurti kryeministër, kjo gjë do të jetë e njëjta. Nuk mund të rrezikojmë fatin e vendit tonë për shkak të një njeriu që dëshiron t’i quajë të gjitha partitë politike hajvana, se dëshiron t’i lodhë partitë politike, se dëshiron t’i rrokatë partitë politike”, tha Abazi.

Ish-deputeti Abazi tha se asnjë nga kauzat e Vetëvendosjes, për të cilat kanë vdekur njerëzit e kësaj partie, nuk janë realizuar. Madje sipas tij, as që është tentuar të realizohen.

“I ka vdekur nëna me u paraqit Kurti si një opozitar i fuqishëm ku dalin njerëzit e vdesin për të në protesta. Asnjë kauzë për të cilën kanë vdekur njerëzit e Vetëvendosjes, as që është tentuar të realizohet. Rrjedhimisht, kemi të bëjmë me një ushqim të popullizmit në Kosovë i cili ushqehet nga picameni i Nju Jorkut, i cili bën me pica natë-e-dit në Nju Jork, dhe në mbrëmje shan e fyen secilin njeri që merret me politikë në Kosovë”, deklaroi ish-deputeti Abazi.