Kryeministri britanik, Boris Johnson, edhe pse i heshtur dhe i painformuar, siç thuhet zyrtarisht, ndryshe nga izraelitët, është detyruar të kthehet nga pushimet në një ishull privat në Karaibe, për të ndjekur më nga afër emergjencën e re gjeopolitike të krijuar, pas vrasjes nga amerikanët të gjeneralit të lartë Iranian, ditë më parë.

Edhe pse Britania duket se nuk ka qenë e përfshire në veprimin amerikan, po përgatitet seriozisht për çdo eventualitet hakmarrës nga Teherani. Londra ka dislokuar në Gjirin Persik fregaten “HMS Montrose” dhe destrojerin “HMS Defender”, të cilat janë urdhëruar nga ministri i Mbrojtjes, Ben Wallece, për të shoqëruar cisternat e naftës që lundrojnë me flamur britanik.

Ndërkohë 50 pjesëtarë të forcave elitare britanike, SAS, janë dërguar në Lindjen e Mesme për të ndihmur në evakuimin potencial të britanikëve.

Sakaq, shefat e mbrojtjes i kanë kërkuar kryeministrit, nëse do dërgojnë tetë avionët “Typhoon” nga baza britanik e Qipros si dhe avionë spiunë “Sentinel” apo dron. Ka plane edhe për dërgimin e ushtarëve britanikë për të siguruar ambientet e ambasadës britanike në Bagdad, ndërkohë që shefat e zbulimit britanik besojnë se ka një kërcënim të besueshëm për ambasadën britanike në Teheran, e cila u sulmua nga turmat në vitin 2011.

Duke folur për “BBC” këtë të diel, ministri i Jashtëm britanik, Domenic Rabb, ka kërkuar nga Teherani të ndjekë rrugën diplomatike për të ç’tensionuar situatën dhe për të dalë nga izolimi ndërkombëtar.

Mbetet te shihet se cilat do të jenë prononcimet e kryeministri Johnson pas pushimeve dyjavore, i cili njihet se ka marrëdhënie të mira me presidentin amerikan, ndryshe nga disa udhëheqës kryesorë evropianë. /Top Channel/