Kryetari i Lidhjes Demokratike të Kosovës, Lumir Abdixhiku, ka mbajtur mbrëmë në Prishtinë një takim me anëtarë të partisë dhe struktura të saj. E pranishme në takim ishte drejtoresha e Drejtorisë së Kulturës në komunën e Prishtinës, sociologia dhe poetja Sibel Halimi. Ajo në llogarinë e vet në “Facebook” ka shpalosur disa hollësi nga programi i Lidhjes Demokratike për kulturën.

“Nga Prishtina në gjithë Kosovën, ndryshimi po vjen në kulturë dhe art me kryeministër Lumir Abdixhikun.

Plani ynë synon zhvillimin dhe promovimin e kulturës dhe artit në nivel nacional dhe ndërkombëtar.

Në fokusin e LDK-së do të jenë prioritet investimet kapitale kulturore, pavarësimi i institucioneve kulturore, fuqizimi e përkrahja financiare e skenës së pavarur dhe artistëve që merren me art dhe kulturë.

Derisa edukimi i hershëm në sistemin parauniversitar, promovimi dhe ndërkombëtarizimi i kulturës dhe artit nëpërmjet diplomacisë kulturore do të jenë pjesë përbërëse e fokusimit të programit për kulturë.

Disa nga projektet dhe iniciativat:

– Ndërtimi i Teatrit të Operës dhe Baletit “Dr. Ibrahim Rugova”.

– Ndërtimi i Teatrit të Ri Kombëtar të Kosovës.

– Ndërtimi i Muzeut Bashkëkohor.

– Themelimi dhe ndërtimi i Muzeut të Paqes dhe Rezistencës.

– Adoptimi i 10 Qendrave Multifunksionale në 10 qytete të Kosovës.

– Themelimi i Qendrës së Librit.

– Decentralizimi dhe Pavarësimi i Institucioneve Kulturore në Kosovë.

– Mbështetja e artit të pavarur.

– Edukimi i hershëm përmes artit dhe kulturës”, ka njoftuar Halimi.