Pas disa ditësh, nga 1 janari, Lewis Hamilton do të jetë zyrtarisht një pilot i Ferrarit. Shtatë herë kampioni i botës në Formula 1 do të lërë Mercedesin për të nisur një aventurë të re me “kokëkuqen”.

Hamiltoni pranon se këto muaj do të “fluturojnë” për të, teksa i duhet të përshtatet me një realitet të ri: “Ky do të jetë pushimi më i shkurtër dimëror që kam pasur ndonjëherë në shumë vite”.

“Do të më duhet të përballem me një kurbë mësimi mjaft të pjerrët ndërsa ndërroj ekipin dhe do të më duhet të asimiloj procedurat që janë të reja për mua. Unë dua të jap gjithçka, absolutisht gjithçka”, u shpreh Hamilton. Më tej, britaniku shtoi: “Jam jashtëzakonisht i emocionuar për këtë aventurë të re dhe mezi pres të takoj të gjithë ekipin. Do t’i përkushtohem me gjithçka kësaj aventure të re me Ferrari, për të arritur objektivat tona”.