Kryetari i Komunës së Mitrovicës, njëherësh kandidiat i PDK-së për kryeministër, Bedri Hamza dhe kryetari i shoqatës “Jetimat e Ballkanit”, Halil Kastrati, kanë përuruar objektin e ri të Qendrës Kryesore të Mjekësisë Fanmiljare (QKMF) në Mitrovicë.

Me këtë rast, Hamza ka thënë se ky objekt madhështor është simbol i transformimit të kujdesit parësor shëndetësor në Kosovë.

“Një kapitull i ri për jetë më të sigurt dhe më të shëndetshme nisi sot në Mitrovicë. Një histori e suksesit, që flet shumë për përkushtimin tonë ndaj shëndetit të qytetarëve. Ndërtimi i objektit madhështor të Qendrës Kryesore të Mjekësisë Familjare ‘Dr. Nexhat Çuni’ është dëshmi e suksesit që mund ta arrijmë kur bashkohemi në qëllime. Me Halil Kastratin, mikun tim, të cilin e falënderoj shumë për bashkëfinancimin e projektit, u bashkuam për t’u kujdesur më mirë për shëndetin e qytetarëve, mirëqenien e tyre dhe për të krijuar kushte më të mira për mantelbardhët, që të mund të shpëtojnë sa më shumë jetë. Ky objekt madhështor është simbol i transformimit të kujdesit parësor shëndetësor në Kosovë.  Sot ndodhi në Mitrovicë. Nesër do të ndodhë anekënd vendit, sepse Kosova mundet ma mirë!”, ka shkruar Hamza në “Facebook”.