Kryetari i Këshillit Kombëtar Shqiptar në Luginë të Preshevës, Ragmi Mustafa, e ka mirëpritur vendimin e Qeverisë së Kosovës për themelimin e Zyrës për ofrimin e asistencës për qytetarët e Luginës së Preshevës në kuadër të Zyrës së Kryeministrisë të Republikës së Kosovës.

“Këshilli Kombëtar Shqiptar mirëpret dhe vlerëson vendimin për themelimin e Zyrës për ofrimin e asistencës për qytetarët e Luginës së Preshevës në kuadër të Zyrës së Kryeministrisë të Republikës së Kosovës. Me këtë rast, falënderova sot përmes një bisede telefonike kryeministrin e Republikës së Kosovës, z. Avdullah Hoti për këtë vendim jashtëzakonisht të rëndësishëm drejt institucionalizimit të çështjes së Luginës së Preshevës nga Republika e Kosovës”, ka shkruar Mustafa në llogarinë e vet në “Facebook”.

Ai ka shtuar se hapja e kësaj zyre është padyshim një nga vendimet më të rëndësishme që kanë ndërmarrë Qeveritë e Kosovës që nga paslufta.

“Sado që mund të duket simbolike, kjo zyre është fillim I veprimit institucional dhe shtetëror të Kosovës, sipas praktikave të shteteve me demokraci të zhvilluar, të cilat kujdesen institucionalisht për ruajtjen dhe zhvillimin e të drejtave të bashkëkombësve të tyre jashtë kufijve shtetërorë. Urojmë që kjo zyre tanimë mënjanon politikat improvizuese qeveritare dhe fillon qasjen institucionale dhe shtetërore në koordinimin, adresimin dhe zgjidhjen e sfidave të qytetarëve shqiptarë të Luginës së Preshevës”, ka thënë ai.

Mustafa ka theksuar se ndërlidhja institucionale në mes të Luginës së Preshevës dhe Qeverive të Republikës së Kosovës dhe asaj të Shqipërisë është jetike për shqiptarët e këtij rajoni.

“Si pjesë e masave të domosdoshme të trajtimit programor e sistematik të çështjeve të shqiptarëve të Luginës ishte edhe kërkesat drejtuar nga kryeministrit Hoti, ku patëm kërkuar edhe hapjen e një zyre të veçantë për shqiptarët e Preshevës, Bujanocit dhe Medvegjës në kuadër të Kryeministrisë”, ka shkruar kryetari i Këshillit Kombëtar Shqiptar në Luginë të Preshevës, Ragmi Mustafa.

(M.Q / Epoka e re)