Pas deklarimeve të ministrit të Infrastrukurës, Liburn Aliu, rreth asaj se ka qenë “gabim premtimi i Kurtit” se autostrada Prishtinë-Gjilan do të përfundonte më 2023, kryetari i Aleancës për Ardhmërinë e Kosovës (AAK), Ramush Haradinaj, ka reaguar duke thënë se ishte nisur gjatë qeverisjes së tij dhe se ka qenë paraparë të kryhej në vitin 2021.

“Zhgënjyes dhe dëshpërues ritmi i punimeve në autostradën Prishtinë – Gjilan! Në autostradën që e filluam gjatë qeverisjes sime më 2018, me gjatësi prej 22.3 km dhe e ndarë në 8 llote, në vetëm 19 muajt e parë të projektit, kanë qenë të përfunduara 47 për qind e punimeve. Me dinamikën e asaj kohe dhe në bazë të planifikimeve tona, ky projekt do duhej të përfundonte në 2021”.

“Pazotësia e qeverisë aktuale, këtë projekt e ka sjellë në gjendje të mjerueshme. Punimet po ecin me ritëm të ngadaltë, duke lënë Gjilanin dhe Anamoravën të izoluar. Kjo përbuzje nga pushteti qendror është e pafalshme. Qeveria aktuale jo vetëm që ka ndërprerë shumë projekte të filluara nga ne, por edhe ato që po vazhdojnë po kryhen me cilësi të dobët. Më 9 shkurt, kemi mundësinë të zgjedhim një qeverisje të re që do t’i japë Kosovës zhvillimin që meriton. Me AAK-në në pushtet, Gjilani do të rikthehet në qendër të investimeve dhe projekteve kapitale”, ka shkruar Haradinaj në “Facebook”.