Kryetari i Aleancës për Ardhmërinë e Kosovës (AAK), Ramush Haradinaj, e ka quajtur kriminel kryeministrin Albin Kurti dhe “klikën e tij” pas humbjes së arbitrazhit në raport me kompaninë amerikane “Contour Global”.

Ai ka insistuar se me këtë investim do t’i jepej Kosovës stabilitet dhe pavarësi energjetike.

Në një konferencë për medie të enjten, Haradinaj i është përgjigjur kritikave të Kurtit, i cili në mbledhjen e djeshme të qeverisë ka fajësuar kryetarin e AAK-së për humbjen e arbitrazhit me “Contour Globalin” e për të cilën Kosova do të paguajë 21 milionë euro.

“Investimi i ‘Contour Globalit’ do të kishte qenë investimi më i madh në Kosovë. Termocentrali ‘Kosova e Re’ do t’i jepte Kosovës stabilitet dhe pavarësi energjetike. Ky projekt do ta bënte Kosovën të pandikueshme nga lufta në Ukrainë sa i përket çmimit të energjisë. Çmimi i megavatit të prodhuar në Kosovë do të ishte shumë më i lirë. Madje do të shisnim energji. Kosova vazhdon të mbetet e varur nga GEN-i (kompania serbe për eksportimin e energjisë me të cilën u pretendua se kishte lidhje ambasadori i Kosovës në Kroaci, Martin Berishaj). Kriminelët kthehet në vendin e krimit shpesh sepse nuk ndëshkohen. Kurti dhe klika e tij që e kanë ndëshkuar ‘Contour Globalin’ janë kriminelë”, ka thënë Haradinaj.

Ai ka thënë se Kosova vazhdon të jetë e varur nga furnitorët tjerë dhe të blejë energji prej tyre edhe pse ka ndodhur pavarësimi energjetik.

“Ende paguhet energjia e humbur në qeveri. Suksesi më i madh ekonomik dhe gjeopolitik dhe sigurisë prej Serbisë dhe Rusisë është pikërisht investimi. Qeveria Kurti duke e kundërshtuar këtë investim dhe duke i dërguar shkresë për ndërprerje e ka liruar nga obligimi me vazhduar me siguri financimin për projekt”, ka thënë Haradinaj.

Ndryshe, kryeministri Albin Kurti, dje në mbledhjen e 212-të të Qeverisë, ka thënë se mbi 21 milionë euro do i ndahen kompanisë “Contour Global”, pasi ka fituar arbitrazhin ndaj Republikës së Kosovës në lidhje me projektin për ndërtimin e Termocentralit “Kosova e Re”, kontratë kjo që ishte nënshkruar në vitin 2017, por që kompania më pas ishte tërhequr dhe kishte paditur Kosovën për mosrespektim të kontratës.