Kryetari i AAK-së, Ramush Haradinaj, ka përkujtuar të premten heronjtë Fehmi dhe Xhevë Lladrovci, në 25-vjetorin e rënies së tyre.

Ai ka thënë se ata ishin simbol i qëndresës dhe krah i fortë i lëvizjes për liri e pavarësi.

“Gjithmonë të parët në rresht, ata luftuan dhe ranë bashkë. Fehmiu dhe Xheva, të cilët kisha fatin edhe t’i njoh nga afër, janë themelet e Kosovës së lirë, Kosovës shtet.  I kujtojmë me respektin më të thellë po ashtu bashkëluftëtarët e tyre, Shefqet Zeka e Fatime Hetemi, dhe të gjithë dëshmorët e Brigadës 114, që me krenari mbajti emrin e Fehmi Lladrovcit.  Në këtë përvjetor, përulemi me nderim para veprës së tyre heroike. Ata do të jenë gjithmonë udhërrëfyesit tonë në rrugën për ndërtimin e shtetit.   Lavdi e përjetshme!”, ka thënë Haradinaj pas homazheve në Gllanasellë të Drenasit.