Kryeministri i Kosovës, Ramush Haradinaj, ka thënë se Fondi Monetar Ndërkombëtar (FMN) ka konstatuar se parashikimet për ngritje të vërtetë ekonomike të Kosovës janë tejkaluar dhe pritet që ky zhvillim të jetë 4.2 për qind.

“Një lajm inkurajues nga Fondi Monetar Ndërkombëtar (FMN) rreth zhvillimit ekonomik të Kosovës. FMN ka konstatuar se parashikimet për ngritje të vërtetë ekonomike të Kosovës janë tejkaluar dhe pritet që ky zhvillim të jetë 4.2 për qind. Për më shumë, politikat e ndërtuara për zhvillim ekonomik parashihen se do të jenë stabile edhe për vitet në vijim”.

“Kosova, përmes këtyre politikave ka ndërtuar kapacitete, ka forcuar sundimin e ligjit, dhe ka bërë mbështetjen e bizneseve për një ekonomi të tregut të lirë. Kemi ende punë për të bërë, por konstatimi pozitiv i FMN-së është inkurajues për vazhdimin e reformave në ekonomi, fuqizimin e prodhimit vendor dhe zhvillimin e qëndrueshëm”, ka shkruar Haradinaj në llogarinë e vet në “Facebook”.

/Epoka e re/