Kryeministri i Republikës së Kosovës, Ramush Haradinaj, gjatë qëndrimit të tij në Londër në kuadër të shumë takimeve me personalitete të ndryshme, sot ka takuar drejtorin për Çështjet e Evropës Jug Qendrore, Matthew Palmer, në Departamentin e Shtetit të ShBA-ve, me të cilin ka biseduar për situatën politike dhe për proceset zhvillimore në Kosovë.

Në takim me drejtorin Palmer, kryeministri Haradinaj ka vlerësuar lart rolin e ShBA-ve në avancimin demokratik të institucioneve të Republikës së Kosovës, duke shprehur gatishmërinë e tij dhe të Qeverisë së Kosovës për thellimin e bashkëpunimit edhe në të ardhmen.

“Populli dhe institucionet e Kosovës janë shumë mirënjohës për ndihmën e pakursyer që ShBA-të,  kanë dhënë për Kosovën, në të gjitha periudhat. Jemi me fat që kemi miqësi të veçantë me shtetin tuaj dhe për këtë jemi krenarë”, ka thënë Haradinaj.

Kryeministri Haradinaj ka bërë me dije se Qeveria e Kosovës është e përkushtuar në forcimin e sundimit të rendit dhe të ligjit, në zhvillimin ekonomik, dhe për hapjen e vendeve të reja të punës të cilat do të ndikojnë në rritjen e mirëqenies për qytetarët tanë.

Ndërkohë drejtori për Çështjet e Evropës Jug Qendrore, Matthew Palmer, ka thënë se ShBA-ja do të vazhdojë që të jetë bashkë me Kosovën në rrugën e saj të forcimit të institucioneve dhe në proceset e konsolidimit ndërkombëtar të saj.