Kryetari i Aleancës për Ardhmërinë e Kosovës (AAK), Ramush Haradinaj, ka kërkuar nga kryeministri i Kosovës, Albin Kurti që të japë dorëheqje.

Gjatë një konference për media, lideri i AAK-së ka thënë se Kurti duhet të japë dorëheqje, sipas tij ka dështuar në procesin e vaksinimit kundër Covidit.

“Po i kërkoj Kurtit me dhanë dorëheqje si alternativë për shkak të mos-seriozitetit të tij në vaksinim. Bota po e jep edhe dozën e tretë të vaksinës, e ne jemi këtu ku jemi”, ka thënë Haradinaj.

Ish-kryeministri Haradinaj është shprehur i shqetësuar me rritjen enorme të numrit të infektuarve me Covid.

“Shifrat janë alarmante dhe janë më të mëdhatë nga marsi i vitit 2020, pra jemi duke shprehur shqetësimin tonë në mënyrën se si po menaxhohet sfida ose rreziku më i madh”, është shprehur ai.

Duke folur rreth vaksinimit, Haradinaj ka thënë se vendet e rajonit janë treguar më serioze në vaksinimin, e Kosova jo.

“Në Kosovë jemi diku rreth 12 apo 13 për qind dhe të qëndrojmë neutral kjo nuk është e pranueshme. Ne i kemi disa kërkesa për qeverinë. Të fokusohet në vaksinim dhe ta trajtojë gjendjen si emergjente dhe mos ta shpërfillë gjendjen siç e ka shpërfillur deri më tash me kandidaturën e ministrit të Shëndetësisë. Është legjitime kërkesa për dorëheqjen e Vitisë, por faji nuk është te ai. Faji është të shefi i tij. Apeloj të Kurti se nëse ky është kualiteti se si ai do të përballet me sfidat më mirë është të japë dorëheqje sot”, ka deklaruar Haradinaj.