Lideri i AAK-së, Ramush Haradinaj, ka kërkuar nga Qeveria që ta heqin masën e ndalim-qarkullimit për festat e fundvitit.

Në profilin e tij në “Facebook”, ai ka shkruar se heqja e kësaj mase do t’i  mundësonte diasporës udhëtim të lirë dhe pa papengesa.

Sipas tij, ndalim-qarkullimi është masa që ekspertët po i konsiderojnë jo shkencore për menaxhimin e pandemisë.

Postimi i plotë i Haradinajt:

Të dashur motra e vëllezër që jetoni jashtë vendit,

Rrugët tuaja drejt vendlindjes nuk u ndalën asnjëherë, as dikur në rrethana okupimi e as sot në liri. Ju i jepni kuptim festave të fundvitit, të cilat do të ishin të zbehta pa ju dhe kjo jo vetëm për faktin që familjet çmallen me ju, por edhe gjallërimi që i bëni ekonomisë së shtetit tonë të përbashkët, vendlindjes tuaj.

U bë më shumë se një vit që edhe Kosova po përballet me pandeminë, ashtu sikur vendet ku jetoni e punoni ju. Fatmirësisht, në këtë fazë ne kemi shumë më pak të infektuar.

Sot i bëj thirrje Qeverisë së Kosovës, që të heqin masën e ndalim qarkullimit, për të mundësuar kështu, udhëtim të lirë e të papengesa për diasporën tonë. Ne duhet t’i mirëpresim motrat e vëllezërit tanë, e jo t’i kufizojmë me masa që ekspertët po i konsiderojnë jo shkencore dhe jo të nevojshme për menaxhimin e pandemisë.

Të dashur bashkatdhetarë. Mirë se vini në shtëpinë tuaj!