Kryeministri i Republikës së Kosovës, Ramush Haradinaj, priti në takim përfaqësues të Kompanisë MNG Group, të kryesuar nga Mehmet Nazif Gynal.

Siç njofton kumtesa nga zyra e kryeministrit, gjatë takimit Haradinaj shpalosi punën e qeverisë në përmirësimin e ambientit të të bërit biznes dhe nxitjen e investimeve të huaja direkte, duke theksuar se Kosova ka potencial për investime dhe ofron kushte të mira bashkëpunimi në kuadër të punës për zhvillimin ekonomik.

“Kosova është një ekonomi e vogël, por me potenciale të mëdha. Jemi të përkushtuar si Qeveri që të ofrojmë kushte të volitshme për të gjithë investitorët e huaj, që ata të ndjehen të sigurt”, tha Haradinaj, duke e ftuar delegacionin për investime direkte në fushën e infrastrukturës.

Kompania MNG Group, shprehu interesim për investime të mëdha kapitale në Kosovë, me fokus të posaçëm në projektin e gazsjellësit që e lidhë Shqipërinë me Kosovën, por edhe në projekte të mëdha të karakterit publik dhe atij publiko-privat.

Takimi me delegacionin e biznesmenëve nga MNG Group u bë pas prezantimit paraprak të shumë projekteve të Kosovës në Samitin e Londrës, në shkurt të këtij viti. Plot 39 projekte me vlerë prej 600 milionë euro janë prezantuar nga Kosova në këtë Samit si plan për thirrjen e investitorëve të huaj për të investuar në vend, projekte këto që janë tejet të rëndësishme për ekonominë e vendit dhe hapjen e vendeve të reja të punës.