Luksemburgu është ndër vendet e para që e ka njohur pavarësinë e Kosovës dhe partner i rëndësishëm në zhvillimin ekonomik, andaj bashkëpunimi ynë në të gjitha fushat me këtë shtet, do të thellohet edhe në të ardhmen.

Kështu ka thënë kryeministri i Kosovës, Ramush Haradinaj, në takim me ambasadorin jorezident të Dukës së Madh të Luksemburgut, Paul Pierre Jean Schmit.

Në këtë takim, ku e pranishme ishte edhe e ngarkuara me punë në Ambasadën e Luksemburgut në Kosovë, Anne Dostert, kryeministri Haradinaj ka falënderuar për ndihmën e shumanshme që Luksemburgu ka dhënë për Kosovën për gjithë këto vite.

Me këtë rast, kryeministri Haradinaj ka kërkuar mbështetjen e Luksemburgut në proceset euroatlantike të Kosovës, me theks të veçantë në liberalizimin e vizave për qytetarët e Kosovës dhe anëtarësimin në organizata ndërkombëtare.

Ndërsa ambasadori jorezident i Dukës së Madh të Luksemburgut, Paul Pierre Jean Schmit, ka theksuar gatishmërinë e vendit të tij që të mbështesë Kosovën në integrimin në Bashkimin Evropian.

Po ashtu, në takimn është biseduar edhe për realizimin e projekteve qeveritare të Luksemburgut në Kosovë, si dhe për investimet e vazhdueshme në fusha të ndryshme.