Kryetari i Aleancës për Ardhmërinë e Kosovës (AAK), Ramush Haradinaj, ka takuar pensionistët, ku ka bërë me dije se është informuar për “pozitën jashtëzakonisht të rëndë të pensionistëve” dhe se ata janë “injoruar skajshëm nga qeveria”.

“Në një bisedë të hapur përmbajtjesore në Shoqatën e Pensionistëve të Kosovës, pata rastin të informohem në hollësi për pozitën jashtëzakonisht të rëndë të pensionistëve, të cilët janë injoruar skajshëm nga kjo qeveri dhe janë lënë me pensione që nuk garantojnë as minimumin ekzistencial të tyre”, ka shkruar Haradinaj në “Facebook”.

Haradinaj ka thënë se sipas programit të tyre për vitet 2025-2029 skemat pensionale do të rriten prej 50 për qind.

Ai ka shtuar se “pensioni për kontributdhënësit nuk do të mbetet nën pagën minimale, e cila do të arrijë në 500 euro”.

“Më këtë rast, në cilësinë e kandidatit për kryeministër nga koalicioni; AAK, Nisma, Konservatorët dhe E-30, pata kënaqësinë që ta shpalos një pjesë të programit tonë që trajton kategoritë e pensionistëve për periudhën 2025-2029. Projeksionet tona për 2025-2029 parashikojnë një rritje prej 50% për të gjitha skemat pensionale. Jemi të vendosur që pensioni për kontributdhënësit të mos mbetet nën pagën minimale, e cila do të arrijë në 500 euro. Gjithashtu, po punojmë për të rishikuar uljen e kriterit prej 15 viteve përvojë pune, i cili aktualisht pengon shumë qytetarë të përfitojnë atë që meritojnë. Është zotim yni edhe rritja përvitshme prej 10% e pensioneve për të gjitha kategoritë”, ka shkruar Haradinaj.