Nasim Haradinaj ka thënë se nuk beson që Gjykata Speciale do t’i jap leje ish-presidentit Hashim Thaçi të marrë pjesë në ceremoninë e varrimit të babait të tij e cila do të mbahet nesër, më 18 mars.

“Ajo gjykatë nuk ka as respektin më themelor të të drejtave të njeriut. Dihet vonesat që i bëjnë për vizita. Dihet që zotëri Thaçi nuk do ta lejojnë dh nëse e lëshojnë besoj se është një befasi që do ta bëjnë. Përkundër që thonë se është gjykatë e popullit, ata kanë frikë nga populli”, ka thënë Haradinaj nga Buroja e Skenderajt.

Nëse Thaçi do të lirohet për të marrë pjesë në varrimin e babait, kanë folur nga Specialja.

Angela Griep, zëdhënëse e Dhomave të Specializuara të Kosovës në Hagë, në një përgjigje për “Periskopi” është shprehur se për një çështje të tillë do të vendosë Paneli përgjegjës.

“Korniza ligjore e Dhomave të Specializuara të Kosovës u mundëson personave të paraburgosur që t’u bëjnë kërkesa gjyqtarëve kompetentë për arsye detyruese humanitare. Gjyqtarët do të vendosin për kërkesa të tilla”, është thënë në përgjigjen e Dhomave të Specializuara.

Më datë 13 mars Hashim Thaçi është lejuar nga Haga të vijë në vizitë te i ati, pasi ju refuzua kërkesa për të katërtën herë.

Thaçi kishte qëndruar tri orë në QKUK në të cilat ishte i rrethuar nga masa të rrepta sigurie nga policë të Speciales.