Kryeministri i Republikës së Kosovës, Ramush Haradinaj, ka pritur në takim lamtumirës, ambasadorin e deritashëm të Maqedonisë në Republikën e Kosovës, Ilija Strashevski, të cilin e ka falënderuar për kontributin e dhënë gjatë misionit të tij, në ndërtimin e marrëdhënieve të mira bilaterale Kosovë – Maqedoni.

“Kosova dhe Maqedonia kanë treguar partneritet të mirë politik, ekonomik dhe diplomatik përgjatë këtyre viteve dhe ky partneritet duhet të vazhdojë edhe në të ardhmen, duke avancuar edhe më shumë marrëdhëniet tona si shtete fqinje”, ka thënë Haradinaj, duke shtuar se vetëm fqinjësia e mirë mund të sjellë paqen e qëndrueshme e cila në Ballkan është tejet e nevojshme.

Ndërsa, ambasadori i deritashëm i Maqedonisë në Republikën e Kosovës, Ilija Strashevski, ka falënderuar kryeministrin Haradinaj për pritjen dhe angazhimin për marrëdhënie të mira bilaterale mes dyja vendeve.

Në këtë takim është diskutua edhe për vazhdimësinë e raporteve të mira diplomatike ndërshtetërore.

/Epoka e re/