Kryeministri i Republikës së Kosovës, Ramush Haradinaj, me ftesë të shefes së Bashkimit Evropian (BE) në Prishtinë, Nataliya Apostolova, ka marrë pjesë të mërkurën në takim pune me shefat e misioneve të shteteve anëtare të BE-së.

Me këtë rast, është diskutuar për të arriturat dhe sfidat e Kosovës në rrugën evropiane, ku kryeministri Haradinaj ka theksuar se Republika e Kosovës është fuqimisht e vendosur për anëtarësimin në BE si prioritet i lartë i saj, derisa vazhdon të punojë pandërprerë për të arritur zbatimin e plotë të MSA-së, dhe të respektojë obligimet e kontratës sonë të përbashkët.

“Qeveria është angazhuar plotësisht në përmbushjen e agjendës evropiane, duke ndërmarr me këmbëngulje reforma të gjithanshme, sidomos për fuqizimin e sundimit të ligjit”, ka thënë Haradinaj, duke shtuar se për të ecur përpara dhe që të sigurohet paqja afatgjatë dhe e ardhmja evropiane për të dy shtetet, jemi të interesuar të arrihet marrëveshja përfundimtare ligjërisht e obligueshme midis Kosovës dhe Serbisë, që rezulton me njohje reciproke.

Po ashtu në këtë takim,  kryeministri Haradinaj ka thënë se ka një sinjal të qartë nga Bashkimi Evropian, se i respekton arritjet tona dhe se kemi mbështetjen e saj në mënyrë aktive, e që është realizimi në kohë optimale i lëvizjes së lirë për qytetarët e Kosovës.

/Epoka e re/