Gjatë qëndrimit në Kosovë, i pari i qeverisë shqiptare, Edi Rama, ka zhvilluar takim edhe kryetarin e AAK-së, Ramush Haradinaj. Ky i fundit ka shpalosur detaje se çfarë ka biseduar me Ramën.

Haradinaj ka bërë me dije se Edi Ramës ia ka kërkuar hekurudhën Kosovë-Shqipëri.

“Po ashtu, diskutuam për gjendjen e sigurisë në Kosovë me theks të veçantë në veriun e vendit”, ka shkruar Haradinaj në llogarinë e vet në “Facebook”.

Postimi i plotë i Haradinajt:

RAMËS I KËRKOVA HEKURUDHËN KOSOVË – SHQIPËRI

Me kryeministrin Edi Rama diskutuam çështjen e finalizimit të hekurudhës Prishtinë – Durrës si projekt i domosdoshëm, që lehtëson qarkullimin dhe lidh edhe më tepër vendet tona, i rëndësishëm për forcimin e sigurisë në rajon dhe integrimin në NATO.

Po ashtu, diskutuam për gjendjen e sigurisë në Kosovë me theks të veçantë në veriun e vendit.

Bashkëpunimi vëllazëror ndërmjet dy vendeve tona është jetik për zhvillimin e gjithëmbarshëm. Qeveritë në Prishtinë dhe Tiranë duhet të bëjnë të pamundurën që të heqin të gjitha barrierat që vështirësojnë bashkëpunimin në të gjitha fushat e posaçërisht në atë ekonomike.