Kryeministri i Republikës së Kosovës, Ramush Haradinaj, ka pritur sot në takim kryetarin e Partisë Demokratike Shqiptare (PDSh), Menduh Thaçi, me të cilin ka biseduar për zhvillimet politike dhe tema tjera të rëndësishme për të dyja vendet.

Me këtë rast Haradinaj ka përshëndetur rekomandimin për hapjen e negociatave për Maqedoninë për anëtarësim në Bashkimin Evropian, duke theksuar se kjo është e rëndësishme për perspektivën evropiane  të rajonit.

Kryeministri e ka njoftuar Thaçin për të arriturat në Kosovë, për rrugën  integruese të Kosovës në BE dhe në NATO, duke theksuar se përkrahja e Maqedonisë në këto procese është e nevojshme për Kosovën.

“Kosova dhe Maqedonia janë shembull se si dy shtet fqinje tregojnë marrëdhënie të mira dhe partneritet të mirë ekonomik dhe politik dhe ky shembull duhet të shërbejë edhe për vendet tjera të rajonit, në mënyrë që në Ballkan të ketë paqe të qëndrueshme”, është shprehur Haradinaj.

Kryetari i PDSH-së, Menduh Thaçi, ka falënderuar kryeministrin Haradinaj për pritjen dhe angazhimin për marrëdhënie të mira bilaterale mes dy vendeve, duke theksuar mundësinë e thellimit të raporteve në të gjitha fushat e interesit të përbashkët.

/Epoka e re/