“Autostrada e Dukagjinit është autostradë jo vetëm e shqiptarëve kudo në Ballkan, por është autostradë e Evropës, sepse ajo lidhë vendbanime në Evropë”, kështu ka thënë kryeministri i Republikës së Kosovës, Ramush Haradinaj, në ceremoninë e fillimit të ndërtim-zgjerimit të rrugës regjionale R 107 qendrore në Deçan.

Me këtë rast kryeministri Ramush Haradinaj ka thënë se kjo zonë ka qenë një tokë e djegur, e shkatërruar dhe minuar, por edhe zonë e lavdisë, me njerëz të aftë të kësaj treve nëpër breza.

“Infrastruktura e lehtëson jetën, rrugët e urat lidhin njerëzit, e bëjnë jetën më të shpejtë, më të saktë, janë nevojë ekonomike, mirëqenie”, ka theksuar kryeministri Haradinaj, duke shtuar se ajo që na bën të ecin përpara, është fakti i kthimit në hartën ekonomike, që do të thotë se infrastruktura na bën më atraktiv për sipërmarrësit, për investitorët, për vende të punës.

Në fjalën e tij në këtë ceremoni ai ka thënë se infrastruktura nxjerrë në pah vlerat tona, edhe ato njerëzore e kombëtare, vlerat e lirisë, memorialet dhe gjithë ato vende të shenjta që nderohen, por gjithashtu nxjerrë në dritë edhe resurset tona, mundësitë ekonomike.

Duke theksuar rëndësinë e kësaj autostrade, kryeministri Haradinaj, ka deklaruar se ata që e kritikojnë këtë autostradë, janë edhe shkurtpamës, edhe hileqarë, duke shprehur gjithashtu se i gëzohet autostradës që e lidhë me Gjilan, me Dheun e Bardhë dhe këtë projekt edhe e ka shtyrë përpara.

“Janë qindra mijëra banorë e ekonomi dhe miliona që i kontribuojnë buxhetit të vendit tonë, pa u thirr në tragjeditë e vuajtjet e të kaluarës e kontributin tonë për liri”, është shprehur kryeministri Haradinaj, duke shtuar se me këto projekte, dëshirojnë të lidhen me ekonominë e Kosovës, rajonit dhe globit, të arrijnë më shpejt në Durrës, në Selanik dhe ata që investojnë në vendin tonë, të arrijnë më shpejt me mallin që e prodhojnë këtu, ta dërgojnë në tregje.

“Nuk vijnë investimet askund kur nuk ka infrastrukturë, nuk vjen askush me hy labirinteve dhe ju siguroj se pa infrastrukturë nuk vijnë investitorët”, ka theskuar Haradinaj, duke përmendur faktin se përpos infrastrukturës, duhet të ketë investim në kanalizim, ujëra të zeza dhe rrymë.

Kryeministri Haradinaj ka thënë se Dukagjini është banka e ujit, jo vetëm e Kosovës, por më shumë dhe se i gjithë brezi, prej grykës së Rugovës e deri në Lepenc, janë mundësi ideale për ujëmbledhës, janë investime shumë të vogla e rëndësia është e jashtëzakonshme.

“I besoj vendit tim, e di që s’jemi njerëz perfekt, e di që gabojmë, e di që duhet ballafaquar me defektet tona, por nuk pranoj të na cilësojë askush mbi këtë dhe si të pa zot dhe si ata që s’mund t’i nxëmë ata që kanë arritur rezultate”, ka thënë Haradinaj, duke shtuar se Kosova do t’i bashkohet Evropës dhe botës euroatlantike.

Ndërsa ministri i Infrastrukturës, Pal Lekaj, ka thënë se kjo ditë është shumë e veçantë për Deçanin pasi po i dhurohet një projekt që ka një simbolikë të veçantë, sepse jo vetëm për qytetarët e Deçanit por ky projekt po i dhurohet këtij regjioni.

Ndërkaq, kryetari i Deçanit, Bashkim Ramosaj, ka deklaruar se ky projekt është shumë domethënës për qytetin e Deçanit, projekt ky që ka filluar të hartohet para 15 viteve por që tash i ka ardhur koha e zbatimit falë ndihmës së Qeverisë Haradinaj dhe ministrit  Lekaj.

/Epoka e re/