Kryeministri në detyrë, Ramush Haradinaj, ka thënë se nuk ka ndonjë informatë se kur mund të ndodhin arrestimet e para nga Gjykata Speciale.

Haradinaj pas mbledhjes së Qeverisë në një konferencë me gazetarë ka thënë se do të ishte mirë të pyeten rreth arrestimeve të mundshme ata që e kanë votuar këtë gjykatë.

“Për arrestimet nuk di asgjë. Më mirë t’i pyesni ata që e kanë votuar gjykatën, ndoshta ata i dinë më mirë procedurat sepse unë jam jashtë informatave. Nuk kam ndonjë informatë. Ata që e kanë votuar e që thoshin është e nevojshme është mirë t’i pyesni se çfarë mendojnë”, është shprehur Haradinaj.

Në këtë konferencë, Haradinaj ka folur edhe për taksën 100 për qind , për të cilën ka thënë se e ka ruajtur sovranitetin e Kosovës.

Haradinaj ka kërkuar nga Qeveria e re që edhe nëse vendos masën e reciprocitetit ndaj Serbisë ta mbajë edhe taksën.

/Epoka e re/