E ardhmja e James Harden do të jetë sërish te Filadelfia. 32-vjeçari ka rënë dakord për një kontratë dyvjeçare për të qëndruar tek kjo skuadër dhe do të fitojë rreth 14.5 milionë dollarë më pak se sezonin e shkuar.

Hardeni do të nënshkruajë një marrëveshje me vlerë pak më shumë se 68 milionë Dollarë, duke siguruar 33 milionë dollarë në sezonin e parë dhe në të dytin 35 milionë. Marrëveshja mes palëve do të zyrtarizohet në orët e ardhshme, për ta shndërruar Harden në mesin e basketbollistëve më të paguar të NBA amerikan.

Mbrojtësi kishte një opsion për të rinovuar në sezonin e ardhshëm për një marrëveshje prej 47.4 milionë Dollarësh, por u refuzua prej tij, me pretendimin se dëshiron t’i japë më shumë liri financiare Filadelfias. Harden është shpallur tre herë pikëshënuesi më i mirë i sezonit, teksa ka një mesatare prej 22 pikësh dhe 10 asistime për ndeshje.