Deputetja e AAK-së, Teuta Haxhiu, ka kërkuar në Kuvendin e Kosovës, të zgjidhet çështja e pensionistëve kontributdhënës, të cilëve nuk u njihet stazhi i punës që nga paslufta, por vetëm stazhi i punës para vitit 1999.

Haxhiu, në fjalën e saj ka thënë se do ta paraqesë një rezolutë në Kuvendin e Kosovës për zgjidhjen e kësaj çështjeje.

Haxhiu ka thënë se këto dispozita ligjore, të bazuara në ligjet e ish-Jugosllavisë, diskriminojnë kontribuuesit.

Ajo ka thënë se po përfitojnë pikërisht ata që i ishin nënshtruar sistemit në atë kohë, ngase vetëm ata nuk ishin larguar dhunshëm nga puna.

“Si rrjedhojë e këtyre fakteve, ka shumë pak kontributdhënës që mund të plotësojnë periudhën 15-vjeçare. Ka shumë prej tyre që për disa javë nuk e plotësojnë këtë kriter. I bie që ai ka punuar gjithë ato vite dhe ai nuk gëzon pensionin dhe kontributin e tij dhe merr një pension sikur dikush që nuk ka punuar fare, pra pension i moshës”, ka thënë Haxhiu.

Më tutje, ajo ka propozuar se secilit t’i njihet stazhi i punës dhe secili të paguhet për aq kontribut sa ka dhënë.

“Është mirë që secili të paguhet për vitet e punës. Pra, për aq vite sa kanë punuar, për aq vite të paguhen. Në rezolutën që do ta paraqes sot, jam i sigurt që të gjitha grupet parlamentare kanë ndjeshmëri për këta pensionistë. Më shumë sinqeritet pres nga të gjitha grupet parlamentare, që ta bëjmë një zgjidhje”, është shprehur Haxhiu.